It's Not That Complicated -- ang babasahin para sa mga Alien! ~ by: Uel Ceballos

Kung ihahalintulad sa isang pagkain ang akdang ito ni Eros Atalia, ang akdang sumunod sa naunang sulating "Ligo na U, Lapit Na Me", ang "Its Not That Complicated" ay isang malinamnam na putaheng kumpleto sa mga rekado at siksik sa sustansya. Pagpapawisan ka sa paghigop ng mainit nitong sabaw na bahagyang pinalapot upang maging masarsa at mag-iwan ng kakaibang lasa sa iyong dila na hinding-hindi mo malilimutan. Pihadong mapapasabak ka sa walang humpay na paglantak sa hain nitong napakamalamang sangkap hanggang sa tumirik ang mga mata mo at maghabol-hininga ka sa rurok ng iyong kabusugan.

Muling pakikibutin ni Intoy ang natutulog niyong puso, pakikislutin ang nanlalamig niyong mga ugat, paaagusin ang nagsesebo niyong dugo at pasasakitin ang nanahimik niyong puson sa muling pagtatagpo nila ni Jen na ngayo’y may kasama pang Tina.

Sila Jen at Tina ang mga alien na sumugod at nanggulo sa buhay ni Intoy hindi upang manakop kundi upang makihati ng saglit sa mumunting mundo ng binata at magbaon ng kapiraso nito sa kanilang pag-alis. Ang kapirasong iyon ng mundo ni Intoy ang gagamitin nila Jen at Tina upang lumikha ng panibagong mundong kanilang pagyayamanin.

Higit pa sa akdang pang-romansa ang It’s Not That Complicated dahil bukod sa likas na pangingiliti nitong taglay ay may hatid din itong nanunundot na paksang magpapasilab sa iyong kaalamang panlipunan. Kumbaga’y hindi lamang nito pauusukin ang tenga’t ilong mo, kundi puputungan ka pa ng bombilyang nagniningas ang liwanag.

Nakakatawa man ang mga linya ni Eros, may angkin namang itong talim na nakalilikha ng malalim na hiwa. Malaya nitong paaagusin ang dugong namuo na sa sobrang tagal nang hindi pagdaloy. 

Nababagay ang prosang ito sa mga alien sa sariling bansa ng sa gayon nama’y makilala na nila ang Pilipinas sa totoo nitong kulay at kalagayan. Baka sakaling magkainteres ang mga Pilipinong alien na ito na magkaisang agawin ang pamumuno sa mga mapagpanggap na nilalang (na silang totoong mga alien). Kapag nangyari iyon tuluyan na nilang masasakop ang Pilipinas at mapagyayamang muli hindi na bilang mga alien kundi mga totoong Pilipinong inangkin na rin sa wakas ang sariling pagkakakilanlan.  

Halina't silipin ang Diary ng Panget Ni: Uel Ceballos

Kung naghahanap ka ng babasahing babasag sa iyong katinuan at magpapakiliti sa natutulog mong ka-kesohan, bakit hindi mo subukang basahin ang kwentong nangunguna ngayon sa mga tindahan ng aklat – Diary Ng Panget by HaveYouSeenThisGirl.

Sa aking pagsasaliksik sa internet, napag-alaman kong Denny pala ang pangalan nitong si HaveYouSeenThisGirl na ayaw magbigay ng buo niyang pangalan (pero willing siyang magpapicture kaya naman makikita niyo ang itsura ng batang ito sa net). Okay, hindi siya Panget katulad ng bida sa istorya na si Eya. Pero sa pagtingin ko sa larawan niya, mapapansing isang simpleng babaeng likas na masayahin itong si Denny. Hindi malayong isipin na katulad din siya ni Eya sa maraming aspeto –malamang sa paraan ng pagsasalita, sa mga kinahihiligan, sa mga expression, at sa mga pananaw sa mga bagay-bagay.

Mabalik tayo sa kwentong isinulat niya. Sa edad kong ito na 25, aaminin kong bumenta sa’kin ang teenage love story na siyang tema nitong Diary ng Panget. Bukod sa umepekto sa akin ang mga katatawanang nakapaloob dito, tinablan din ako ng kilig sa love story nila Cross at Eya, kahit pa sabihing ang istorya nila ay karaniwan mo nang mababasa sa iba pang nobela at mapapanood mo pa sa karamihan ng mga pelikulang may kahalintulad na tema.

Pero ano nga ba ang naging kaibahan ng Diary ng Panget sa iba pang kwento at humakot ito ng milyon-milyong atensyon sa watt.pad na siyang naging dahilan para mapansin ng isang publisher? Lalo pang sumikat ang kwento nila Cross at Eya nang maisalin na sa aklat ang istorya at dumami pa ngang lalo ang naging mambabasa ng kwento.

Sa aking palagay, wala naman din talagang dahilan para hindi kagiliwan ang Diary ng Panget. Hindi ko lang tiyak kung aalma dito ang mga masugid na tagasulong ng tamang paraan ng pagsusulat at masusing pagobserba sa teknikalidad ng literaturang Pilipino. Bumenta sa kabataan ang kwento ni Denny,bumenta din ito sa mga hindi na “bata”(katulad ng henerasyon namin). Ibig sabihin lang, hindi mo kailangang magpakulong sa kombensyonal na pamamaraan para lamang maipahayag ang mga bagay-bagay na nais mong maibahagi sa karamihan.

Wika nga ni Denny, simple lang naman ang kwento nila Eya at Cross, typical. Subalit sa kabila ng kasimplehan nito, siguradong magpipinta naman ito ng ngiti sa mga labi at magdudulot ng kagalakan sa kalooban ng sinumang makababasa nito.

Kalabaw nga lang daw ang tumatanda, hindi ibig sabihin na nalipasan ka na ng iyong kabataan ay hindi na nararapat na babasahin sa’yo ang Diary ng Panget. Remember, we are forever young at heart! Kaya kung icebreaker sa mga nakakaburyong na problema at trabaho ang hanap mo, hetong Diary ng Panget ang babasahing nababagay sa’yo. Basta huwag ka lang OA na pa-deep at pa-high standard kuno dahil hindi mo nga talaga kasisiyahan ang pagbabasa ng ganitong istorya na kung tutuusin ay may makabuluhang mensahe namang hatid. Try to loosen up dude,makigulo ka muna kina Cookie Monster at Cookie Bear. Naway’y kagiliwan mo ang pagbabasa nito. Enjoy!

https://www.facebook.com/Now-Brewing-539673826127554/?ref=hl